Patung-patong na kaso, iniharap vs anak ni Cong. Teves
Nambugbog, nagpaluhod ng sekyu
MANILA, Philippines — Ipinagharap na ng reklamo sa piskalya ng Las Piñas City si Negros Oriental Board Member Kurt Matthew Teves, anak ni 3rd District Rep. Arnolfo Teves Jr. dahil sa pambubugbog sa isang security guard ng isang subdivision noong Marso 16, 2022.
Ayon kay Las Piñas City police chief Lt. Col. Jaime Santos, kabilang sa mga kasong inihain sa prosecutor’s office laban kay Kurt Matthew ay physical injuries, grave threats, at paglabag sa Omnibus Election Code.
Matatandaang naghain ng reklamo sa pulisya ang biktimang sekyu na si Jomar Pajares, nakatalaga sa gate ng Concha Cruz sa Las Piñas City matapos ang pambubugbog, at paghahamon sa kanya ng barilan ni Kurt Matthew.
Nakita rin naman sa nag-viral na video na pinaluhod pa ng batang Teves si Pajares nang hindi papasukin sa gate ng BF Homes dahil sa kawalan ng sticker.
Dahil sa pangyayari, si Kurt Matthew ay nagbitiw bilang Negros Oriental Board Member at humingi ng paumanhin sa insidente.
Nabatid na una nang nagpahayag ang BF Federation of Homeowner Associations Inc. (BFHAI) na makikipagtulungan at magsasampa ng direktang reklamo laban kay Kurt Matthew.
Gayunman, hindi ito natuloy dahil sa pagtigil na rin ni Pajares na makipag-ugnayan sa kanila.
- Latest
