Miyembro ng Batang City Jail, huli sa droga at submachine gun
MANILA, Philippines — Ilegal na droga at baril ang nasamsam sa isang 27-anyos na miyembro ng Batang City Jail (BCJ) sa isinagawang buy-bust operation ng Pasay City Police, sa nasabing lungsod nitong kamakalawa.
Kinilala ang suspek na si Marvin Potento, alyas Boy/Onse, na kabilang sa drug watchlist ng Pasay City Police Station.
Dakong alas 11:40 ng gabi noong Miyerkules nang isagawa ang buy-bust operation laban kay Potento sa Apelo Cruz St., Brgy. 157 Zone 16, Pasay City .
Sa ulat ni P/Colonel Cesar Paday-Os, ikinasa ang operasyon ng Station Drug Enforcement Unit, at nang makabili ng shabu ay inaresto na si Potento kung saan nasamsaman dito ang nasa 7.9 gramo ng shabu na nagkakahalaga ng P53,720.00 at isang Cobray 9mm submachine gun, isang magazine na kargado ng 5 bala.
Inihahanda na ang pagsasailalim sa inquest proceedings sa Pasay Prosecutor’s Office ng mga reklamong paglabag sa Republic Act 9165 (Comprehensive Dangerous Drugs Act of 2002), at RA 10591 (Illegal possession of firearms and ammunitions) in relation to Omnibus Election Code of the Philippines laban kay Potento.
- Latest
