‘Resbakuna sa Botika’ umarangkada na rin sa Parañaque
MANILA, Philippines — Inilunsad na rin kahapon sa Parañaque City ang “Resbakuna sa Botika” sa pamamagitan ng The Generics Pharmacy (TGP) Brgy. Sun Valley para sa mas mabilis na pagbibigay ng booster shots at maging ng first at second dose.
Pinasalamatan ni Mayor Edwin Olivarez ang pagdalo nina Presidential Adviser for Flagship Program and Projects Secretary Vince Dizon at Robina Gokongwei-Te, presidente ng TGP sa paglulunsad ng “Resbakuna sa Botika.”
Sinabi ni Olivarez na bukod sa booster shots, magsasagawa rin nang pagbabakuna para sa first dose at second dose sa mga ‘di pa bakunado ang TGP.
Binigyang-diin ni Olivarez ang kahalagahan ng pagpapabakuna laban sa COVID-19 kaya wala pa sa 20 porsyento okupado ang treatment facility sa lungsod, ayon sa ulat ng City Health Office (CHO) at City Epidemiology and Surveillance Unit (CESU).
Patuloy pa rin, aniya, ang pagbabakuna sa bawat barangay.
Sinabi ng alkalde na 732, 346 na residente na katumbas ng 140.45 porsyento ang nakatanggap ng kanilang unang doses, 677, 976 o 130.03 porsyento ang fully vaccinated, habang 112,366 ang nakatanggap ng kanilang booster shot.
- Latest
