Chinese kalaboso sa food packs na may shabu

MANILA, Philippines — Kalaboso ang isang  Chinese national nang dumalaw sa kaibigan na nakapiit at mabuking na may itinatagong ilegal na droga sa dalang food packs, sa Parañaque City, kahapon ng hapon.

Kinilala ang suspek na si  Zhao Wei, 32 , tubong Liao Ning, China at residente ng Ortigas Pasig City.

Sa ulat ng Parañaque Police-Solaire Sub-station, dakong alas-2:00 ng hapon nang arestuhin ang suspek ng Solaire Police Sub-Station Custodial Facility sa Solaire basement parking, Aseana 1 Entertainment City, Barangay Tambo, Parañaque City.

Bago pumasok ng jail ang banyaga ay  dumaan ito sa standard operational procedure na pag-inspeksyon sa dalang bag, kung saan nakita sa ilalim ng food packs ang isang maliit na sachet ng shabu, na pasalubong sa isang kaibigang nakapiit doon.

Nakatakdang isailalim sa  inquest proceedings ang suspek sa paglabag sa Republic Act 9165 o Comprehensive Dangerous Drugs Act 2002.