2 lalaki natagpuang patay sa tabi ng SUV sa Pasig

PASIG, Philippines — Dalawang lalaki  na may mga tama ng bala sa iba’t ibang bahagi ng katawan, ang natagpuang patay sa tabi ng isang sports utility vehicle (SUV)  na nakaparada malapit sa Manggahan Floodway sa Brgy. Sta. Lucia, Pasig City kahapon ng madaling araw.

Inaalam pa ng mga awtoridad ang pagkakakilanlan ng mga biktima, gayundin ng mga salarin sa krimen.

Batay sa ulat ng Pasig City Police, dakong alas-2:00 ng madaling araw nang madiskubre ang mga bangkay na nakahandusay sa tabi ng isang puting Mitsubishi Montero, na walang plaka, at nakaparada sa East Bank Road, Brgy. Sta. Lucia.

Sa imbestigasyon, lumilitaw na nakarinig na lamang ng mga putok ng baril ang mga residente sa lugar.

Matapos ang ilang sandali, isang testigo ang nagtungo sa lugar at dito nadiskubre ang mga duguang biktima kaya’t inireport sa pulisya.

Rumesponde naman ang Pasig Emergency Unit ngunit idineklara nang patay ang mga biktima, na hindi umano taga-Pasig ngunit posibleng magkakilala ang mga ito.

Wala na rin ang mga salarin sa krimen.

Inaalam naman ng mga awtoridad kung posibleng may kinalaman sa transaksiyon sa ilegal na droga ang krimen matapos na makadiskubre ng dalawang pakete ng shabu mula sa eyeglass case ng isa sa mga biktima, na tinatayang nagkakahalaga ng P100,000.

Patuloy ang imbestigasyon sa kaso.