‘Tulak’ pumalag sa buy-bust, sugatan sa shootout

MANILA, Philippines — Sugatan ang isang drug suspect na target ng buy-bust operation makaraang makipagbarilan sa mga tauhan ng Pasay City Police , habang dalawa pa ang nadakip, kahapon ng madaling araw.

Isinugod sa pagamutan ang sugatan na si Gerald Punzalan, alyas Gorio, 30, nasa drug watchlist ng pulisya, ng  Brgy. 14 Zone 2, ng naturang lungsod.

Kasama ring nadakip ang mga suspek na sina Michael Borja, 26, ng Baseco Compound, Port Area,  Brgy. 649 Manila at si Richard Dela Cruz, 28.

Sa ulat ng pulisya, naganap ang insidente dakong ala-1:45 ng madaling araw sa kanto ng FB Harrison Street at Nuestra Seniora, Brgy. 5 Zone 2, Pasay City.  Isang buy-bust operation ang ikinasa ng Station Drug Enforcement Unit kung saan target nila ang suspek na si Punzalan.

Matapos na magkabayaran, nakahalata ang suspek na may nakapaligid na pulis kaya naglabas umano ito ng baril at pinaputukan ang mga awtoridad.  Gumanti ang mga pulis na nagresulta sa pagkakasugat nito.

Nakumpiska ng mga pulis ang nasa 4.6 gramo ng hinihinalang shabu na nagkakahalaga ng P31,280, isang baril,  anim na bala, dalawang basyo ng bala at P1,000 marked money na ginamit sa operasyon.