Menor-de-edad napatay ang bayaw
MANILA, Philippines — Isang 17-anyos na binatilyo na itinago sa pangalang Rom-rom ang inaresto at nakakulong sa Manila Police District-Homicide Section makaraang mapatay niya ang kanyang bayaw sa labas ng kanilang bahay sa 717 Isla Extension, Barangay 177, Tondo, Manila kamakalawa ng gabi.
Itinuring ang suspek na CICL o children in conflict matapos niyang mapatay ang bayaw na si Junior Omambak Y De Vera, 25-anyos, vendor at residente rin ng naturang lugar.
Lumalabas sa imbestigasyon na, bandang alas-8:00 ng gabi, bisperas ng Bagong Taon, nadatnan ni Rom-rom ang lasing na si de Vera na nagwawala at pinagbabato ang nahahawakang mga gamit malapit sa kanilang bahay.
Sinabihan ng suspek ang biktima ng “Kuya bakit ka nagwawala, new year na new year”. Nagalit lalo ang biktima at ibinaling sa suspek ang kanyang galit.
Nang may makapang gunting sa lapag ang suspek ay dinampot ito at itinarak sa dibdib ng bayaw.
Isinugod sa Tondo Medical Center ang biktima na idineklarang patay alas-10:00 ng gabi ng Disyembre 31.
Nakatakas ang suspek kaya nagsagawa ng follow-up operation ang Gagalangin Police Community (PCP) hanggang mahuli ito.
- Latest
