Pamangkin tigok sa saksak ni tiyo

MANILA, Philippines — Isang sadistang mister ang napatay ng kanyang tiyuhin matapos saksakin nang ‘di maawat sa pang-aaway at pananakit nito sa kanyang misis naganap sa Brgy. Gulod, Novaliches, Quezon City, kamakalawa ng gabi.

Ang biktima ay kinilalang si Egie Villamin Asuncion, 27, construction worker, at residente ng No.40 Joan Arc St., Brgy. Gulod, Novaliches, Quezon City.

Ang suspek na tiyuhin ng biktima na mabilis na tumakas matapos ang krimen na ngayon ay tugis na ng mga pulis ay si Jimuel Ulag Sadidul, 41.

Sa imbestigasyon, dakong alas-7:05 ng gabi nag-away umano ang biktima at ang misis nito na si Rona Jane sa loob ng kanilang tahanan.

Dito ay gumitna ang tiyuhin at inawat ang mag-asawa sa pag-aaway pero sa halip na huminto ang biktima ay mas lalong nagalit at pinaghahampas pa nito ang kaniyang misis kaya napilitan ang suspek na saksakin nito ang biktima sa ilalim ng kili-kili.

Naisugod pa ang biktima sa Novaliches General Hospital subalit binawian din ito ng buhay habang ginagamot.