Babaeng pasahero ng LRT, dinampot sa ‘bomb joke’

MANILA, Philippines — Isang babaeng pasahero ang inaresto dahil sa ‘bomb joke’  habang papasok ng  LRT-line 1 Baclaran Station sa Pasay City  kamakalawa.

Kinilala ni P/Col. Bernard Yang, hepe ng Pasay City Police ang dinakip  na si Maribeth Florentino, 23, ng  Santa Quiteria, Caloocan City.

Nabatid na papasok na sa paid-area ng LRT station si Florentino nang magbiro itong may bomba sa dala niyang bag.

Dahil dito, agad siyang pinigil ng lady guard at saka sinearch ang kanyang bag at saka siya dinala sa Bac­laran Police Community Precinct.

Nagpaalala naman ang pulisya na huwag magbibiro ng bomba lalo na sa mga pampublikong lugar tulad ng terminals, airports at seaports.