Trike driver, itinumba ng tandem
MANILA, Philippines — Patay ang isang tricycle driver na sinasabing sangkot sa iligal na droga nang pagbabarilin ng riding-in- tandem, kamakalawa ng gabi sa Caloocan City.
Nakilala ang nasawi na si William Macalintal, alyas Willy, 49, ng Brgy. 177 Camarin, ng naturang lungsod.
Sa ulat ng Caloocan City Police, alas-9:20 ng gabi nang maganap ang pagpaslang kay Macalintal. Kapaparada lamang ng biktima sa ipinapasada niyang tricycle sa may Navarro Street sa Maligaya, Brgy. 177 nang dumating ang dalawang salarin na magkaangkas sa isang motorsiklo.
Hindi pa nakakababa ng triycle ang biktima nang paulanan siya ng bala sa ulo at katawan ng mga salarin na mabilis ring tumakas. Bigo naman ang mga saksi na makilala ang mga gunman dahil sa kapwa nakasuot ang mga killer ng face masks.
Ayon sa isang saksi, kilalang sangkot rin umano sa aktibidad sa iligal na droga sa kanilang lugar si Macalintal. Isa ito ngayon sa tinitignan na anggulo ng pulisya sa naturang pamamaslang.
- Latest
