Quezon City rescuers, ipadala sa Davao City para sa re-training

MANILA, Philippines — Iminungkahi kahapon ni Quezon City Acting Mayor Joy Belmonte na ipadala ang mga first responders o rescuer ng lungsod sa Davao City upang magsanay at pag-­aralan ang kahanga-hangang emergency response capabilities nito.

Iniatas ito ni Belmonte kay Karl Michael Marasigan, hepe ng QC Disaster Risk Reduction and Management Office (QCDRRMO), matapos niyang makausap ang anak ng pinaslang na si Deputy Prosecutor Rogelio Velasco.

“The daughter told me she had to rush her father to the hospital herself because nobody, no emergency res­ponse teams came to assist them,” pahayag ni Belmonte na ngayo’y humahalili bilang alkalde dahil si Mayor Herbert Bautista ay nasa Europe.

Binaril at napatay ng mga hindi nakilalang salarin si Velasco nitong Mayo 11 sa kahabaan ng Holy Spirit Drive sa Brgy. Holy Spirit.  Kasama niya noon ang dalawa niyang anak.

“Hindi sapat na nakakatanggap ng maraming awards o pagkilala ang QCDRRMO. At the end of the day, what will you do with your awards if, when the people need you, you’re not there for them? So, maybe, there is a disconnect. Maybe our results, our self-praise, must come from how many people we have actually responded to in their time of need,” dagdag pa ni Belmonte.

Anya, maraming matututunan ang QCDRRMO sa Davao City na may epektibong emergency and rescue system.

 Kamakailan lang ay dumalaw si Belmonte sa Davao City kung saan pinakita sa kanya ni Mayor Sara Duterte-Carpio ang iba’t ibang emergency response facilities ng lokal na pamahalaan tulad ng kanilang 911 emergency hotline center.