Police Major itinumba ng tandem

MANILA, Philippines -  Pinagbabaril at napatay­ ng riding in tandem ang isang police major na naka­ta­laga sa Criminal Investigation and Detection Group (CIDG) habang nagpapakarga­ ng ga­solina sa Pasig City nitong Martes ng madaling araw.

Kinilala ang nasawing biktima na si Chief Inspector Rommel Macatlang, 52, nakatalaga sa CIDG-National Capital Region sa Camp Crame.

Si Macatlang ay idineklarang dead on arrival sa Pasig City General Hospital sanhi ng mga tinamong tama ng bala sa iba’t-ibang bahagi ng kaniyang katawan.

Sa ulat ni Pasig City Po­lice chief P/Sr. Supt. Orlando Yebra Jr., naganap ang insi­dente sa Shell gasoline station sa panulukan ng F. Ortigas Jr. at Meralco Avenue sa Brgy. San Antonio ng lungsod dakong alas-12:30 ng mada­ling araw.

Ayon sa imbestigasyon, pauwi na ang biktima sa ka­­niyang tahanan lulan ng kulay puting Mitsu­bishi Adventure (CRT 560) na pansaman­ta­lang huminto sa Shell ga­­soline station para magkarga ng gasolina matapos na du­malo sa selebrasyon ng ka­­ara­wan ni Sr. Supt. Belli Ta­mayo, hepe ng CIDG-NCR nang mangyari ang insidente.

Sa puntong ito ay biglang sumulpot sa lugar ang riding in tandem kung saan agad na bumunot ng baril ang back­­rider at pinagbabaril ng sunud-sunod ang biktima .

Sunud-sunod na putok ang umalingawngaw sa lugar na sumapul sa katawan ng opisyal habang mabilis namang nagsitakas ang mga suspek patungo sa hindi pa malamang destinasyon.

Agad namang sumaklolo ang Pasig City Rescue Team sa crime scene at isinugod sa pagamutan ang biktima pero idineklara itong dead on arrival.

Kasalukuyan na ngayong­ nirerebyu ng mga imbestigador ng CIDG-NCR ang footage ng CCTV camera na na­kakabit sa lugar upang matukoy at maaresto ang mga salarin.

Pinaniniwalaan namang may kinalaman sa mga kasong hawak ng biktima ang motibo ng krimen habang patuloy ang masusing imbes­tigasyon sa kaso.