2 dayuhan biktima ng ‘rugby boys’ sa Maynila

MANILA, Philippines – Dalawang dayuhan kabilang ang isang Polish at isang Indian  ang kapwa naagawan ng gintong kuwintas at hikaw ng mga rugby boys na nagkalat sa Maynila.

Sa reklamong idinulog sa Manila Police District-General Assignment and Investigation Section (MPD-GAIS), ni Joanna Sychovics, 26, tubong Poland, civil engineer at nanunuluyan sa Adriatico, Malate, Maynila,  naglalakad sila ng nobyong si Maciej Michalek sa Soler St. Binondo, Maynila  dakong alas-3:05 ng hapon nitong Biyernes, nang biglang hab­lutin ang kaniyang hikaw.

Dahil sa paghingi ng saklolo sa mga tao ay nadakip naman ang suspek na si Val Catucod, 29, subalit hindi na narekober ang hikaw na posibleng ipinasa sa kasamahan.

Bandang alas -6:00 ng hapon nang agawan naman ng kwintas si Apeorsia Hanne, 22,  estudyante,at nanunuluyan sa UPHSD Dormitory sa Las Pinas City.

Naglalakad umano sa gilid ng Indian Temple sa Paco, Maynila ang biktima nang hablutin ng suspek na nasa edad 18-20 ang suot niyang gintong kuwintas na nagkakahalaga ng P20,000.

Pinaniniwalaang ang mga nagkalat na rugby boys ang gumawa ng dalawang snatching dahil sa paglalarawan ay akma sa mga lalaking nasa kalye na may hawak ng plastik at sinisinghot ang laman nito habang nasa kalye.