2 ‘tulak’ huli sa drug bust
MANILA, Philippines – Dalawang lalaki na sangkot sa pagtutulak ng shabu ang naaresto ng awtoridad matapos ang isinagawang buy-bust operation sa Cubao, Quezon City kahapon ng madaling araw.
Sa ulat ni PO2 Richie Gaerlan ng Quezon City Police Statin 7, nakilala ang mga suspect na sina Amado Eugenio, 46, at Rudy Barbolla, 50, binata; kapwa residente ng Brgy. San Roque, Cubao.
Base sa pagsisiyasat ni Gaerlan, nangyari ang operasyon sa mismong tinutuluyan ng mga suspect, ganap na alas-12:30 ng madaling araw.
Bago ito, nagsagawa ang mga operatiba sa pangunguna ni P/Senior Insp. Mario Manipon ng surveillance laban sa mga suspect dahil sa ulat na iligal na aktibidad ng mga ito sa kanilang lugar.
Nang mag-positibo, agad na pinlano ang buy-bust operation kung saan isang pulis ang nagpanggap na bibili ng halagang P200 shabu sa mga suspect, na nagresulta sa nasabing pagkaka-aresto.
Kasong paglabag sa Republic Act 9165 o ang comprehensive dangerous drug act of 2002 ang kinakaharap ngayon ng mga suspect.
- Latest
