Nagpaputok sinita, binata kinuyog
MANILA, Philippines – Nasa pagamutan ang isang binata nang kuyugin ng kanyang mga kapitbahay nang sawayin niya ang isa sa mga ito dahil sa pagpapaputok ng firecrackers sa Mandaluyong City, kamakalawa ng gabi.
Sugatan ang biktimang si Paul Christian Velardo, 20, at residente ng Welfareville, Brgy. Addition Hills matapos na kuyugin ng magkapatid na sina Norberto at Danilo Orcajada, Ino Talde at dalawa pang hindi pa nakikilalang lalaki gamit ang kutsilyo at bolo.
Sa ulat ng pulisya, nabatid na naganap ang insidente dakong alas-9:00 ng gabi kamakalawa sa Welfareville sa Barangay Addition Hills.
Nauna rito, sinita ni Velardo ang mga nasabing kapitbahay na naghagis ng paputok sa labas ng kaniyang bahay.
Gayunman, sa halip na humingi ng paumanhin, nakipagtalo pa ang suspek kay Velardo, saka pinagtulungan ang biktima.
Nakatakas ang mga suspek habang isinugod naman ng kanyang mga kaanak sa Mandaluyong City Medical Center ang biktima dahil sa tinamong sugat sa ulo, braso at balikat.
- Latest
