Karpintero utas sa utol ng tenant

MANILA, Philippines – Patay ang isang karpintero matapos itong pagsasak­sakin ng kapatid na lalaki ng kanyang tenant kamakalawa ng gabi sa Las Piñas City.

Dead on arrival sa Our Lady of Fatima Hospital ang biktimang si Robert Garvez Gaspay, 48, nakatira sa Block 4, Lot 15, Madrigal Compound, Barangay Daniel Fajardo naturang lungsod.

Nagtamo ito ng ilang saksak sa iba’t ibang bahagi ng katawan. Tinutugis na ng pulisya ang suspek na si Rodrigo Bello, 30, binata, delivery boy, nakatira sa naturang lugar.

Sa inisyal na report na nakarating sa tanggapan ni Police Sr. Supt. Jemar D. Modequillo, hepe ng Las Piñas City Police, bandang 10:30 ng gabi sa Block 4, Lot 15, Madrigal Compound, Bgy. Daniel Fajardo ay pinuntahan ng biktima ang suspek na nakatira sa bahay ng kanyang kapatid na si Jennylyn Bello Gallardo, tenant ni Gaspay.

Kinompronta ng biktima ang suspek at hindi naman na­ilagay sa report ng pulisya ang dahilan. Dahil dito ay lumabas si Jennylyn at sila na ang nagkasagutan ni Gaspay at sa pagtatalo ng dalawa ay kumuha ng patalim si Rodrigo at walang salitang pinagsaksak nito ang biktima.

Matapos ang pananaksak ay mabilis na tumakas ang suspek at ang biktima naman ay dinala sa naturang ospital ng ilang taong naroroon, subalit hindi na ito nakarating ng buhay.