Lolo nagbigti

MANILA, Philippines – Winakasan ng isang lolo ang sariling buhay nang magbigti ito sa loob ng pinapasukang kompanya sa Navotas City, kamakalawa ng madaling araw. Nakilala ang nasawi na si Martin Jimenez, Sr., 69-anyos, at caretaker ng Bellen and Sons Commodities, Inc. na nasa Lapu-Lapu Street, Brgy. North Bay Boulevard South, ng naturang lungsod. Sa ulat ng pulisya, dakong alas-4:30 ng madaling araw nang madiskubre ang nakabigting bangkay ng biktima sa loob ng kuwarto niya sa kompanya ng security guard na si Gary Gabat. Tumanggi naman ang mga kaanak ni Jimenez na ipasailalim sa awtopsiya ang bangkay at magsagawa ng imbestigasyon dahil sa kumbinsido sila na kusang winakasan nito ang kanyang buhay. Tikom naman ang bibig ng pamilya sa anumang problema na dinaranas ng nasawi na dahilan ng pagpapatiwakal nito.