Sekyu binoga na, sinaksak pa

MANILA, Philippines – Tiniyak na patay bago iwan ang isang 47-anyos na security guard na matapos barilin ng tatlong ulit ay sinaksak pa sa dibdib, habang naghahapunan sa tabi ng pampang sa Baseco Compound, Port Area, Maynila, kamakalawa ng gabi.

Kinilala ang nasawi na si Abraham Ampatuan, ng  Block 22, Lot 3, Baseco compound.

Sa ulat ni SPO2 Richard Escarlan ng Manila Police District-Homicide Section, naganap ang insidente dakong alas-8:30 ng gabi sa seawall  sakop ng Block 9, Baseco.

Nakarinig lamang umano ng tatlong magkakasunod na putok ang mga residente bago nakita ang nakahandusay na biktima sa semento.

Nagtungo umano sa seawall ang biktima at doon kuma-in ng hapunan nang paputukan sa likod at sinundan pa ng dalawang saksak sa dibdib ng hindi pa nakikilalang salarin.

Nang usisain ng anak na si Bainor Ampatuan ang narinig na putok, doon niya nakita ang amang duguan kaya dinala pa sa Gat Andres Bonifacio Memorial Medical Center kung saan idineklarang dead-on-arrival.

Wala pang nakuhang impormasyon ang pulisya sa pagkilanlan ng salarin at motibo sa krimen.