Mister binistay ng bala

MANILA, Philippines – Nasawi ang isang 50-anyos na mister matapos pagbabarilin ng kalugar na umano’y matagal na nitong kaalitan habang ang biktima ay naglalakad sa Navotas City.

Dead on arrival sa Tondo Medical Center sanhi ng mga tama ng bala ng hindi mabatid na kalibre ng baril sa iba’t ibang bahagi ng katawan si Danilo Mendoza, ng Block 36, Lot 84, Tumana, Barangay North Bay Boulevard South ng nasabing lungsod.

Tinutugis na ang suspek na nakilalang si Mark Len Villanueva “alias Mac-Mac”, 27,  ng Phase 2, Area 2 ng nasabing barangay.

Sa ulat na natanggap ni Police Sr. Supt. Dante Pesa Novicio, hepe ng Navotas City Police, alas-7:00 ng gabi nang maganap ang insidente malapit sa bahay ng biktima.

Naglalakad ang biktima ng mapansin nito ang suspek na bigla na lamang naglabas ng baril at walang sabi-sa-bing pinutukan si Mendoza.

Sa labis na takot ay tumakbo ang biktima papunta sa kanilang bahay upang ilig­tas ang sarili subalit, hinabol pa rin ito ng suspek at barilin.

Hindi na umabot ng buhay sa ospital ang biktima.