Rider patay, binatilyo sugatan sa van

MANILA, Philippines - Patay ang isang motorcycle rider habang malubha naman ang isang binatilyo nang kapwa mabundol ng isang rumaragasang delivery van, kahapon ng madaling araw sa Caloocan City.

Hindi na umabot ng buhay sa Caloocan City Medical Center­ ang 23-anyos na si Raymond Manalo, residente ng Lakas ng Mahirap, Brgy. 11, ng naturang lungsod, habang inoobser­bahan naman ang kundisyon ng 13-anyos na si John Jaime Derder, ng PNR Compound, Caloocan.

Arestado naman ang driver ng Isuzu Forward aluminum van (RJB-320) na si Nestor Natividad, 52, ng Solano, Nueva Ecija.

Sa inisyal na ulat, binabagtas ng van ang Samson Road patungo ng Monumento nang mahagip ang binatilyong si Derder na naglalakad sa gilid ng kalsada sa may kanto ng Heroes Del.

Pagkabig sa kabila ng manibela ng tsuper, nahagip naman ng van ang Suzuki motorcycle (1793 SN) na minamaneho ni Manalo sanhi upang sumemplang ito at pumailalim sa van. Nagtamo ng matinding pinsala sa ulo at katawan si Manalo na dahilan ng pagkasawi nito.

Agad namang nasakote ng mga awtoridad si Natividad na nahaharap ngayon sa kasong reckless imprudence resulting to homicide and physical injuries.