Misis ng opisyal ng DepEd, maid dinos-por-dos, patay

MANILA, Philippines - Nadatnan na lamang na duguan at wala nang buhay ang misis ng isang mataas na opisyal ng Department of Education (DepEd) at ang kaniyang kasambahay sa loob ng bahay, sa Pasig Line, Sta. Ana, Maynila, kahapon ng hapon.

Kinilala ang nasawi na si Lucita Menguito, 53, negosyante at residente ng Pasig Line Sta. Ana, Maynila.  Siya ay misis ni Department of Education (DepEd) Assistant Regional Director (ARD)-National Capital Region (NCR) Dr. Ponciano Menguito, ang dating Division of City Schools, Manila Superintendent.

Patay din ang housemaid ng biktima na kinilalang si  Jennifer Magtulis. Matitinding palo sa ulo at katawan ang tinamo ng mga biktima.

Nadakip naman sa mabilis na follow-up operation ng  mga tauhan ni MPD-Homicide Section ang suspek na kinilalang si John Adrian Esquilang, 37, manugang ng biktima at residente ng Molave Park, Merville  Subdivision, Parañaque City.

 Sa inisyal na impormasyon na nakuha sa Manila Police District-Homicide Section, dakong alas-12:00 ng tanghali kahapon nang madiskubre ang krimen mismo ni Dr. Menguito.

Batay sa imbestigasyon ni  PO3 Bernardo Cayabyab, dumating ang suspek sa bahay dakong alas-10:00 ng umaga at umalis na nagmamadali.

Nagawa pa umanong magtext ni Gng. Menguito kay Dr. Menguito na nasa opisina at pinauuwi dahil sa problema sa bahay.

Naging susi sa krimen ang isang  batang babaeng  kapitbahay, na tumestigo sa nakita sa krimen. Aniya, tagabantay siya ng mga aso ng biktima upang hindi nakawin.

 Sa isinagawang police line-up, positibong itinuro ang suspek ng batang testigo, maliban pa sa nakitang dugo sa damit ng suspek.