Sanggol dinukot ng helper
MANILA, Philippines – Tinutugis na ngayon ng mga awtoridad ang isang 38-anyos na helper na sinasabing tumangay ng isang buwang sanggol, kamakalawa sa Marikina City.
Lumilitaw sa imbestigasyon ni officer-on-case na si PO3 Jenelyn Oro, na ang suspek ay nakilalang si Melfa Salvador, residente ng Buntong Palay Purok 1, San Mateo, Rizal.
Si Salvador ang itinuturong dumukot sa isang buwang gulang na sanggol na anak ni Charmaine Santos, 21, residente ng Blk. 9 Lot 3 Phase 1 Balubad Nangka, Marikina.
Nabatid na ang suspek ay live-in partner ng biyenan ni Santos. Sa salaysay ni Santos sa pulisya, dumating sa kanilang bahay ang suspek mula sa San Mateo upang dalawin ang kanyang biyenan na siya nitong laging ginagawa.
Dahil tulog si Santos ay inalagaan ng suspek ang sanggol dakong alas-11:00 ng gabi. Sinamantala naman nito ang pagtulog ni Santos saka tinangay ang beybi.
Nang magising ang ina ay laking panlulumo nito nang madiskubreng wala na ang suspek tangay ang kanyang anak.
Humingi ng tulong sa kanyang mga kamag-anak ang ina at nagtungo sila sa inuupahang bahay ng suspek sa San Mateo ngunit wala na ito.
Ayon sa mga kapitbahay ng suspek, nakita nila na karga nito ang sanggol pati na ang kagamitan nang ito’y umalis. Nagsasagawa na ng manhunt operation ang pulisya.
- Latest
