Ex-call center agent, nagtangkang mag-suicide, nandamay ng 3, arestado

MANILA, Philippines - Isang dating call center agent ang inaresto matapos itong magtangkang magpakamatay sa pamamagitan ng pagtalon sa Metro Rail Transit (MRT),  na naging dahilan upang masu­gatan ang tatlong pasahero, kamakalawa sa Makati City.

Nasa custody ng Makati City Police si Mark Robert Connor, 31, nakatira sa Brgy. Pio Del Pilar ng naturang lungsod.

Sa naturang insidente nasugatan ang mga pasaherong sina Elisa Aying, 45; Lolita Hermeginio, 60, biyuda at Julie Ann Tentativa, 26.

Sa reklamo ng Department of Transportation and Communication (DOTC), MRT 3 sa tanggapan ni Senior Supt. Ernesto Barlam, hepe ng Makati City Police, naganap ang insidente alas-4:00 ng hapon sa Southbound lane ng MRT-Ayala Station ng naturang lungsod.

Base sa salaysay ng naka­talagang guwardyang si Robert Lee Reonal, nakita niyang nagtangkang tumalon ang suspek na si Connor sa riles habang paparating ang tren. Mabuti na lamang at biglang nakapreno ang operator ng train at hindi naman ito nahagip.

Gayunman, sa lakas nang pagsubsob ng mga pasahero kung saan tatlo ang nasugatan.

Dahil dito, dinakip na si Connor at dinala ito sa himpilan ng Makati City Police  at sinampahan ito ng kasong alarm and scandals. Ang sugatan namang mga biktima ay dinala sa Ospital ng Makati, patuloy na iniimbestigahan ang naturang insidente. Hindi pa mabatid kung ano ang dahilan sa tangkang pagpapakamatay ni Connor.