Mag-ina,1 pa huli sa droga
MANILA, Philippines - Arestado ang isang mag-ina na nabubuhay sa pagtutulak umano ng iligal na droga kasama ang isa pang babae sa ikinasang operasyon ng mga tauhan ng Malabon City Police, kahapon ng umaga sa naturang lungsod.
Nakilala ang mga nadakip na sina Elizabeth Mamariso, alyas Elizabeth Dela Vina Tatac, 68; anak nitong si Ricardo Mamariso, 32; at si Edna Closa, 52.
Sa ulat ng Malabon Police Anti-Illegal Drug-Special Operations Task Group, isinagawa ang operasyon sa kuta ng mag-inang Mamariso dakong alas-7:30 ng umaga sa bisa ng search warrant na inilabas ni Malabon City Regional Trial Court Branch 74 Judge Celso Magsino.
Nadiskubre umano ng mga pulis sa ginawang paghahalughog sa bahay ng mga suspek ang nasa walong gramo ng hinihinalang shabu sanhi upang arestuhin ang tatlo.
Nakadetine ngayon ang mga suspek sa Malabon Police detention cell habang inihahanda ang pagsasampa ng kasong paglabag sa Comprehensive Dangerous Drugs Act of 2002.
- Latest
