E-game shop hinoldap

MANILA, Philippines – Hinoldap ng may halagang P200,000 cash ng dalawang holdaper ang isang E-Game shop sa Quezon City kahapon ng madaling-araw.

Sinasabing dakong alas-2:30 ng madaling-araw nang pasukin ng dalawang holdaper na armado ng baril ang E-Game na matatagpuan sa Verde Oro Bldg. Brgy. Old Balara, Quezon City.

Lumitaw sa imbestigasyon ng pulisya na sumulpot na lamang ang dalawang lalaki na nakasuot ng helmet at green jacket sa loob ng E- Game shop at agad nagbunot ng baril at nagdeklara ng  holdap.

Unang tinutukan ng baril ng mga suspek at pinadapa ang kostumer na si Richard Luis, 29 habang sapilitan namang ipinakuha kay Roxel Huerto ang pera sa kaha. Nang makuha ng dalawang holdaper ang kanilang pakay, mabilis na tumakas ang mga ito sakay sa nakaparadang motorsiklo sa kahabaan ng Commonwealth Avenue.