Kagawad, 2 tanod hinoldap habang nagpapatrulya

MANILA, Philippines – Isang kagawad ng ba­rangay at dalawang tanod ang hinoldap ng miyembro ng ‘Bahala na Gang’ habang ang mga ito ay nagpa­patrulya, kahapon ng madaling-araw sa Malate, Maynila.

Nagreklamo sa Manila Police District Station 9 sina Josephine Picayo, 49, Bgy. Kagawad ng  Brgy. 705 Zone 77; Tito Vargas, at Ludivico Mondala, kapwa tanod ma­tapos na tutukan ng baril at sapilitan kunin ang  ang kanilang cellphone at P1,500 na cash ng suspek na si Ryan Christian Canoy, 18, ng #1 Maria Orosa St., Malate.

Batay sa ulat ng pulisya, nagpapatrulya ang tatlo dakong alas-5:30 ng madaling-araw sa kahabaan ng San Andres sa Malate, nang bigla umanong sumulpot ang arma­dong suspek, saka sila tinu­tukan ng baril.

Kaagad naman nagsagawa ng follow-up operation ang pulisya sa pinangyarihan at namataan nila ang suspek na naglalakad.

Nabawi naman sa suspek ang kinulimbat nito sa mga biktima habang inihahanda na ang kaukulang kaso laban dito.