Selosong bf, ipinakulong ng gf
MANILA, Philippines – Dahil sa ginawang pananakit at pagkaladkad sa kanya sa harap ng maraming tao kaya ipinakulong ng isang dalagita ang kanyang selosong boyfriend sa Marikina City, kahapon ng hapon.
Nagreklamo sa Women’s and Children Protection Desk (WCPD) ng Marikina police ang biktima na itinago sa pangalan Tintin, 16, nakatira sa Malaya St., Brgy. Malandalay, sa lungsod.
Ang suspek na ngayon ay nakakulong sa Marikina City Detention Cell ay si Edward Bianes, 22, security guard, nakatira sa Libis Bulelak, Marikina City.
Base sa reklamo ng biktima kay PO3 Jenelyn Oro ng WCPD, ang pananakit ng suspek at pagkaladkad sa kanya ay naganap dakong ala-1:15 ng hapon habang naglalakad siya kasama ang mga kaklaseng babae at isang lalaki sa kahabaan ng J. Molina St., Brgy. Concepcion Uno, nang madaanan umano sila ng boyfriend nito na si Bianes na noon ay nakasakay sa bisikleta.
Galit na galit na huminto ang suspek at sinigawan ang biktima na “boyfriend mo ba to” habang itinuturo ang kasabay na kaklaseng lalaki, sabay hablot ng suspek sa shoulder bag ng biktima na naging dahilan upang makaladkad ito.
Pagkahila sa bag ay pasigaw pang pinagsabihan ng suspek ang dalagita na sumakay sa bike pero tumanggi ang biktima kung kaya’t buong lakas na hinaltak sa kanang braso bago itinulak pabalik sa kanyang kaklaseng lalaki.
Dahil sa higpit at lakas ng pagkakahaltak ng suspek sa braso ng biktima kung kaya’t nagtamo ito ng sugat at kanya pang ikinatumba sa kalsada.
Dahil sa pangyayari ay nagsumbong ang biktima sa kanyang ina at sinamahan nito ang kanyang anak sa himpilan ng pulisya at ipinaaresto ang suspek.
Nahaharap ngayon sa kasong paglabag sa RA 9262 (Physical Abuse) at RA 7610 o Child abuse ang suspek.
- Latest
