2 carjacker patay sa shootout

MANILA, Philippines – Patay ang dalawang hindi pa nakikilalang carjacker makaraang makipagbarilan sa mga tauhan ng QCPD Anti-Carnapping Unit (DACU) matapos nilang tangayin ang isang motorsiklo sa lungsod Quezon, kamakalawa ng gabi.

Sa ulat na nakarating kay QCPD Director Chief Supt. Joel D. Pagdilao, dakong alas-11:30 ng gabi  nang maganap ang insidente sa Ciudad Verde, Greater Fairview, Quezon City.

Bago ito, tinutukan ng baril ng dalawang suspek si Michelle Libre ng Greater Fairview at sapilitang tinangay ang sinasakyan nitong motorsiklo na Suzuki Raider (3541 ON) sa may Regalado Avenue.

Nabatid na agad na naialarma ang naturang insidente. Tiyempo naman na nasabat sa isang checkpoint ang mga suspect na pinapara ng mga pulis, subalit imbes na huminto ay pinaharurot ang tinangay na motorsiklo.

Nagkaroon pa ng ilang minutong habulan kung saan pinaputukan ng mga suspect ang humahabol sa kanilang mga pulis.

Napilitan namang gumanti ng putok ang mga awtoridad na ikinasawi ng mga suspect.

Kinilala naman ng biktima na si Libre na sumugod sa crime scene na ang mga suspek ang tumangay sa kanyang motorsiklo na Suzuki Raider.

Bukod sa nabawing motorsiklo ni Libre ay nakumpiskahan pa ng dalawang .38 kalibre ng baril ang dalawang nasawing carjacker.