Lolo itinumba sa QC

MANILA, Philippines – Maghahatid lamang sana ng apo sa eskwelahan ang isang lolo, ngunit siya ang ihahatid sa huling hantungan matapos tambangan ng dalawang kalalakihan sa lungsod ng Quezon ngayong Lunes ng umaga.

Iba't ibang tama ng bala sa katawan ang ikinamatay ng biktimang si Reynaldo Gile, 63.

Base sa pangunang imbestigasyon, sakay ng L-300 van (RJL-776) si Gile nang ihatid niya ang kanyang apo sa paaralan bandang 6:35 ng umaga.

Pinagbabaril ang biktima nang mapadaan sa  panulukan ng Quirino Highway at kalye ng San Francisco sa Barangay San Bartolome.

Ayon sa mga testigo, dalawang gunman ang pumaslang kay Gile na nakasugot ng helmet kaya hindi nakilala.

Ligtas ang apo ng biktima.

Patuloy pa rin ang imbestigasyon ng mga awtoridad.