P400-M shabu nasamsam sa Parañaque

MANILA, Philippines – Timbog ang isang lalaki matapos makumpiska sa cargo nito ang nasa 40 kilo ng shabu na aabot sa halagang P400 million nang pinagsa­nib na puwersa ng PNP-Aviation Security Group at Anti-Illegal Drugs Special Operations Task Force (AIDSOFT) at Parañaque City Police sa isang warehouse sa Paraña­que City, kahapon ng hapon.

Nasa custody na ngayon ng pulisya at iniimbestigahan na ang suspek na si Danilo Pineda, taga May­nila.

Nabatid kay Atty. Roque Merdeguia, ng PNP-AIDSOFT, ilang araw na nilang inaantabayanan kung sino ang kukuha ng 4 na kahon na bagahe na inilagay sa warehouse ng Peoples Air Cargo and Warehousing Company o pair cargo sa NAIA Avenue Parañaque City.

Alas-2:00 kahapon ng hapon nang dumating sa na­sabing lugar si Pineda upang i-claim ang apat na kahon na may lamang water pump, subalit nang ins­peksiyunin ng mga pulis, ito pala ay nagla­laman  ng droga.

Nabatid na bawat isang kahon ay may laman na water pump na kulay green at sa loob ng tangke o cylinder ng pump ay mayroon nakasiksik na maliit na kulay itim na bag na kung saan nakalagay ang shabu na umabot sa tig-sampung kilo.

Napag-alaman na ang na­­turang kontrabando ay du­­­mating sa bansa noong Dis­­yembre 28 mula sa Hong Kong sakay ng Cathay Pacific flight number TX-903.

Iginiit naman ni Pineda na hindi niya alam na may lamang shabu ang mga pi­nakuhang bagahe ng kanyang amo (hindi binanggit ang pangalan ng kanyang amo) na sinasabing matagal na umanong importer ng water pumps.