Bebot nagutay, ilang ulit nasagasaan
MANILA, Philippines - Nagkalasug-lasog ang katawan ng isang hindi pa nakikilalang babae matapos masagasaan at magulungan ito ng iba’t ibang uri ng sasakyan sa isang flyover sa Pasay City, kahapon ng madaling-araw.
Nahihirapan ang pulisya na kilalanin ang bangkay ng biktima dahil nga nagkahiwalay-hiwalay ang katawan nito kung saan pinaniniwalaang isa sa nakasagasa rito ay 10-wheeler truck dahil sa ebidensiyang nakita sa bangkay nito.
Sa inisyal na pagsisiyasat ni PO3 Edmar Echate, ng Traffic Accident Investigation Unit (TAIU) ng Pasay City Police, alas-4:00 kahapon ng madaling-araw nang matagpuan ang lasug-lasog na katawan ng biktima sa south-bound lane ng flyover ng Roxas Boulevard ng naturang lungsod.
Walang makapagsabi kung anong sasakyan ang unang dumale rito.
Sa ngayon ay patuloy pang iniimbestigahan ang naturang insidente at ang bangkay ng biktima ay nakalagak ngayon sa Rizal Funeral Homes.
- Latest
