Jeepney driver, itinumba sa harap ng anak

MANILA, Philippines – Patay sa mismong manibela ng ipinapasadang  jeep ang isang 50-anyos na driver nang barilin sa ulo sa harap ng 9-taong gulang na anak, habang  nakaparada sa tapat ng Sto. Nino Church, sa Tondo, Maynila.

Dead-on-the-spot ang biktimang si  Eleuterio Zarceno, ng Block 16 Lot 2 Phase 2,  Dagat-dagatan, Caloocan sanhi ng tinamong bala sa ulo. Hindi tukoy ang pagkakilanlan ng hindi nakilalang salarin na mabilis tumakas matapos ang insidente.

Sa ulat ni SPO2 Mario Asilo ng Manila Police District-Homicide Section, dakong alas-6:45 ng gabi ng maganap ang insidente sa harap ng nabanggit na simbahan sa Zamora  St., Tondo. Nabatid na habang nakaparada at naghihintay ng mga pasahero ang biktima, na katabi pa ang anak na babae ay biglang lumapit ang suspek at  agad na pinutuk an nang malapitan sa ulo ang biktima.

Napasubsob sa manibela at agad na nasawi ang biktima habang mabilis namang tumakas ang suspek. Patuloy pa rin ang isinasagawang imbestigasyon sa naganap na krimen.