Nurse kritikal sa saksak ng ‘Akyat bahay’
MANILA, Philippines – Nasa kritikal na kalagayan ang isang nurse makaraang tadtarin ng saksak ng mga hinihinalang magnanakaw na nanloob sa kanilang bahay sa Valenzuela City, kamakalawa ng umaga.
Inoobserbahan sa Fatima Medical Center ang biktimang nakilalang si Elena Enriquez Mendoza, 49, De Guzman Street, Marulas, ng naturang lungsod.
Sa ulat ng Valenzuela Police, nabatid na inutusan ng biktima ang anak na si Noel na magpa-load sa tindahan. Nang makabalik si Noel sa bahay dakong alas-10:15 ng umaga, bumulaga na sa kanya ang duguang katawan ng ina. Dali-daling humingi ng saklolo ang anak sa mga kapitbahay at isinugod ang biktima sa naturang pagamutan.
Sa pagsusuri ng mga imbestigador, nakita ang basag na salamin sa masters bedroom ng bahay na posibleng pinasukan ng mga salarin. Hindi naman malinaw kung may nanakaw sa loob ng bahay ang mga salarin na maaaring nagmamadali sa pagtakas.
Patuloy ang imbestigasyon ngayon ng pulisya upang makakuha ng dagdag na ebidensya at makilala ang mga salarin.
- Latest
