Hinulog ng solvent boys Adamson student, 6 na araw sa manhole
MANILA, Philippines - Pinaniniwalaang pinagtripan ng lima hanggang pitong solvent boys ang isang estudyante ng Adamson University nang itapon sa manhole na tumagal ng halos isang linggo sa Intramuros, Maynila.
Batay sa report ng security guard na si Kenneth Minez, ng RJC Security and Investigation Agency, nasa Gomburza 2 siya nang dakong ala-1 ng madaling-araw ng Nobyembre 23 nang marinig niya ang paghingi ng tulong ng biktimang si Carl Francis Abarro, 18, ng Tondo, Maynila.
Sa salaysay umano ng biktima, Nobyembre 17, bandang alas-6:30 ng gabi nang harangin siya ng mga solvent boys sa Gomburza St.
Dito ay binully siya ng mga solvent boys at pagkatapos ay pinagtulungang inihulog sa manhole.
Nang matantiya umano ng biktima na wala na ang solvent boys ipinasya na nitong sumigaw ng tulong na nakatawag pansin naman kay Minez.
Nabatid na walang anumang pagkain at inumin ang biktima habang nasa loob ng manhole.
Mabilis namang na-rescue ang biktima at dinala sa ospital.
Nabatid na pitong araw na ring hinahanap ang biktima ng kanyang pamilya.
- Latest
