MM umalerto kay Ruby

MANILA, Philippines - Libong residente sa mga mababang lugar sa Metro Manila partikular na ang mga naninirahan sa estero at mga tabing-ilog ang inilikas kaugnay ng ibinabang alerto sa malalakas na pagbuhos ng ulan na dulot ng bagyong Ruby.

Inalerto ng National Di­saster Risk Reduction and Ma­nagement Council (NDRRMC­) ang mga naninirahan malapit sa Manila Bay na umiwas sa pa­nganib ka­ugnay ng storm surge na nasa 3-4 metro ang taas bunga ng pag-landfall ng bagyong Ruby (alas-6-alas 8 ng gabi) sa Laiya, Batangas.

Nakansela rin ang klase sa lahat ng antas at mayorya sa mga tanggapan ng gob­yerno bunga ng inaasahang matitinding pag-ulan na dulot ng bagyong Ruby.

Sa tala ng Office of Civil Defense (OCD)-National Capital Region (OCD-NCR) kabilang dito ay ang nasa 2,000 katao sa katimugang bahagi ng Metro Manila na sumasaklaw sa Parañaque City, Alabang at Las Piñas City.

Sa Marikina City ay nasa 247 pamilya o 1,197 katao sa Brgy. Tumana habang nasa 15 pamilya o katumbas na 77 katao sa Brgy. Langka; pawang sa Marikina.

Nasa 35 pamilya naman o 135 katao mula sa 3 ba­rangay ang inilikas mula sa Brgy. Potrero at ilalim ng tulay na nasa kritikal o flood prone areas.

Isinailalim na rin sa heightened­ alert status ang nasa 11 lugar dito sa Metro Manila kaugnay sa nakatakdang pag­hagupit ng bagyong Ruby. Pinayuhan ng NDRRMC­ ang mga residente sa 17 bayan at siyudad sa Kalak­hang Maynila na lumikas na habang maaga dahil sa mataas ang posibilidad ng mga pagbaha.

 Sinabi naman ni Col. Adrian Sanchez, Chief of Staff ng Joint Task Force NCR, 8 M35 truck, tatlong rubber boat at limang 450M truck, amphibians ang inihanda para sa rescue operations at preemptive evacuation. Apat na platoon naman ng mga sundalo ang naka-standby para sa deployment habang nasa 418 sundalo ang ipinakalat para sa rescue mission partikular na sa Parola at Baseco compound kung saan nagmamatigas ang mara­ming mga residente na lisanin ang kanilang mga tahanan.