Salpukan ng 2 motorsiklo: 2 rider patay
MANILA, Philippines - Kapwa nasawi ang dalawang rider matapos magsalpukan ang kanilang minamanehong mga motorsiklo habang sugatan naman ang dalawang angkas na dalagita sa Malabon City, kamakalawa ng gabi.
Dead-on-the-spot sanhi ng tinamong pinsala sa ulo at katawan ang biktimang si Jonathan Velerosa, 19, ng San Diego St., Brgy., Arkong Bato Valenzuela City.
Namatay naman habang ginagamot sa Jose Reyes Memorial Hospital sanhi rin ng tinamong pinsala sa ulo at katawan si Noel Oliver Dizon, 25, call center agent at residente ng Vicencio St., Brgy. Niugan Malabon City.
Kapwa naman ginagamot sa San Lorenzo Ruiz Women Hospital sanhi rin ng mga tinamong pinsala sa katawan ang dalawang dalagita na sina Angelica Yap, 13; at Hannah Gualao, 16.
Ayon sa ulat ng Traffic Management Unit ng Malabon City Police, naganap ang insidente alas-11:00 ng gabi, angkas ng biktimang si Velerosa sa kanyang motorsiklo ang dalawang dalagita galing sa Arkong Bato, Valenzuela City patungong Maysilo, Malabon City.
Pagsapit sa kahabaan ng M.H. Del Pilar St., Brgy. Santolan, Malabon City ay nakasalpukan ni Velerosa ang motorsiklo ni Dizon na naging dahilan upang tumilapon ang mga ito.
Agad na namatay ang biktimang si Velerosa habang dinala naman sa mga naturang pagamutan ang ibang sugatan, namatay din habang ginagamot si Dizon kung saan inaalam na ng mga pulis kung sino ang tunay na may kasalanan sa naturang insidente.
- Latest
