Sanggol iniwan sa CR

MANILA, Philippines – Gutom na gutom at umiiyak ang isang malusog na bagong silang na sanggol na babae nang matagpuan sa loob ng isang comfort room (CR) ng isang gusali sa Makati City kahapon ng umaga.

Ayon kay Inspector Mau Gutierrez, hepe ng Women and Children’s Complaint Desk ng Makati City, dakong alas-11:00 ng umaga nang matagpuan ang sanggol sa CR sa ground floor ng Solares Bldg. 1 na matatagpuan sa Dela Rosa St., Makati City.

Naglilinis ng CR ang janitress na nakilala lamang sa pangalang Cecil nang makarinig siya ng malakas na palahaw na iyak ng sanggol. Agad na hinanap at tinunton ni Cecil ang pinagmumulan ng iyak hanggang sa makita niya ang sanggol na nakabalot ng kulay puting lampin na nakalapag sa CR.

Nasa Ospital ng Makati ngayon ang sanggol at sumasailalim sa masusing
medical check-up.

Sa ngayon ay binubusisi na ng mga tauhan ng Makati police ang nakalagay na Close Circuit Television (CCTV) sa gusali upang mabatid kung sino ang walang pusong ina na nag-iwan sa sanggol.