Presyo ng petrolyo, tumaas

MANILA, Philippines - Bumawi na ang mga kompanya ng langis matapos ang anim na sunod-sunod na rollback, makaraang ipatupad kahapon ang pagtaas ng presyo ng kanilang produktong petrolyo.

Nabatid, na sabay-sabay na nag-abiso ang Petron Corporation, Pilipinas Shell at  Chevron Philippines hinggil sa taas presyo ng kanilang produkto. Nasa  P0.20 kada litro ang itinaas sa  presyo ng gasolina, P0.25  sa diesel at P0.30 naman sa kerosene na epektibo kahapon ng alas-6:00 ng umaga.

Kaagad namang sumunod ang PPT Philippines, Phoenix Petroleum at Total na kahalintulad din ng halaga.   

Ayon kina  Petron Strategic Communications Manager Raffy Ledesma, Toby Nebrida ng Pilipinas Shell at Ning Ignacio,  ng Chevron Philippines,  ang panibagong pagtaas sa presyo ng mga produktong petrolyo ay bunsod sa paggalaw ng halaga ng langis sa pandaigdigang pamilihan.