LRT nagkaaberya uli

MANILA, Philippines - Muling nagkaaberya ang biyahe ng Light Rail Transit (LRT) 1 at ilang minutong naantala ang operasyon nito dahil sa problemang teknikal ng bagon nito, kamakalawa ng gabi.

Nabatid kay Atty. Hernando Cabrera, spokesperson ng Light Trail Transit Authority (LRTA), alas-7:35 ng gabi nang magkaproblema  ang isang tren sa bahagi ng Doroteo Jose Station­ north-bound.

Ayon kay Cabrera, nabatid na labing limang minuto lamang naantala ang biyahe  at agad naman aniyang  naibalik sa normal ang operasyon nito  alas-7:50 ng gabi matapos maitulak ang isa sa mga bagon nito.

Aniya agad naman natanggal ang train  na nagkaproblema, kung  kaya’t hindi naman naging malala ang naging aberya ng biyahe  nito .

“Ang priority kasi maitulak muna natin para gumalaw na rin ‘yung ibang mga tren na nasa likod at para magtuluy-tuloy ang biyahe” pahayag pa ni Atty. Cabrera.

 Hindi naman maipaliwanag ni Cabrera kung anong uri ng problemang teknikal ng naturang train.