Totoy sangkot sa holdup-slay ng family driver, arestado
MANILA, Philippines - Hawak na ng mga awtoridad ang isa sa apat na binatilyong sangkot umano sa panghoholdap at pagpatay sa isang family driver sa Sta. Cruz, Maynila noong Martes ng madaling araw.
Positibong itinuro ng security guard na testigo sa harap ni P/Insp. Steve Casimiro, hepe ng Manila Police District-Homicide Section ang nadakip na suspect na itinago sa pangalang Jun-jun, 16-anyos, residente ng Pedro Guevarra St., Sta.Cruz, Manila.
Tatlo pa sa mga menor de edad na suspects ang patuloy na tinutugis ng mga operatiba. Ang mga ito ay sinasabing nasa edad na 17 at 14 anyos.
Nabatid na napatay ng mga suspects ang biktimang si Benedicto dela Cruz, 52, residente ng Pedro Guavarra St., Sta.Cruz, noong Martes alas-4:00 ng madaling-araw sa panulukan ng Fugoso at Natividad Sts. Sta. Cruz, Manila.
Sa ulat ni SPO3 Glenzor Vallejo, nakita umano ng sekyu ang paghila ng bagpack ni dela Cruz nang nadakip na suspek at nang pumalag ang biktima ay pinagtulungang saksakin saka iniwan. Nabatid na tanging laman lang ng kinuhang bag sa biktima ang baon nitong kanin at ulam at pamasahe na isang daang piso.
- Latest
