Kelot pinaghuling hapunan, bago inutas

MANILA, Philippines - Pinatapos munang maghapunan ang isang  backhoe operator bago ito niratrat at napatay ng hindi pa nakikilalang mga salarin, kamakalawa ng gabi sa Valenzuela City.

Nakilala ang nasawi na si Richard Padilla, 39,  ng  Sitio San Isidro, Brgy. San Jose, Antipolo City.  Agad namang nakatakas ang apat na salarin lulan ng isang puting pick-up van.

Sa inisyal na ulat ng Valenzuela City Police, kumain muna ng hapu­nan ang biktima kasama ang mga kasamahan sa trabaho na sina Julio Casino at Nestor Abello sa isang karinderya sa may Mindanao Avenue Extension sa Sitio Sulok, Brgy. Ugong, dakong alas-7 ng gabi.

Nang makakain, lu­ma­bas ng karinderya ang biktima at nagtungo sa isang tindahan upang bumili ng sigarilyo.  Dito na ito niratrat ng bala ng mga salarin na nang matiyak na wala nang buhay ang biktima ay tumakas tungo sa direksyon ng Brgy. Kaybiga,  Caloocan City.

Tinangkang habulin naman ng mga tauhan ng Police Community Precinct 8 ang mga s­a­larin ngunit nakawala ang mga ito dahil sa pasikot-sikot na kalsada sa hangganan ng Valenzuela at Caloocan.

Nakuha ng mga tauhan ng Scene of the Crime Operatives ang 17 basyong bala ng kalibre .45 baril. Patuloy namang inaalam ng mga imbestigador ang mo­tibo sa naturang krimen.