Vendor, pisak sa trailer truck

MANILA, Philippines - Kalunus-lunos  ang sinapit na  kamatayan ng isang vendor makaraang magulungan at mapisak ng isang trailer truck, kamakalawa ng hapon sa Navotas City.

Nakilala ang nasawi na si Noel Martinez, 56, isang fishball vendor, at residente ng PFDA Compound, Fish Port, North Bay Boulevard South (NBBS), ng naturang lungsod.

Sumuko naman sa pulisya at nahaharap ngayon sa kasong reckless imprudence resulting to homicide ang driver na suspek na si Aladen Estrada, 36, ng Tondo, Maynila.

Sa ulat ng pulisya, tumatawid sa Road 10 sa NBBS ang biktima dakong alas-9:50 ng gabi nang mahagip ng rumaragasang 16-wheeler trailer truck na minamaneho ni Estrada.

Napailalim umano ang biktima at tuluyang nagulungan ng trak na may libong-kilo ang timbang sanhi upang mapisak ang katawan nito.