5 naka-motorsiklo namaril: 1 patay, 3 sugatan
MANILA, Philippines - Isa ang nasawi, habang tatlo ang nasugatan sa pamamaril ng limang kalalakihan sakay ng tatlong motorsiklo sa may kahabaan ng Unit 5 Bato-Bato St. Brgy. Commonwealth, Quezon City, kahapon ng alas-12:30 ng madaling-araw.
Kinilala ang nasawi na si Ariel Bigonte, 27, ng Adarna St.,Brgy. Commonwealth, QC na idineklarang dead-on-arrival sa ospital.
Nasugatan naman sina Rowena Encarnacion, 44; Alejandro Encarnacion, 49; at Mary Grace Lorego,44, na pawang inoobserbahan sa pagamutan.
Sinasabi ni SPO1 Alejandro Camacho ng QC Station 6 Batasan, magpapahinga na sana ang mga biktima nang biglang dumating ang limang kalalakihan sakay ng tatlong motorsiklo na pawang nakasumbrero at pagbabarilin ang mga biktima.
Nabatid pa sa ulat na ang puntirya umano ng mga suspek ay ang nasawing si Bigonte at nadamay lamang umano ang mga nasugatan.
Blangko naman ang pulisya sa motibo ng naganap na krimen habang patuloy pa ring isinasagawa ang imbestigasyon ukol dito.
- Latest
