Dumalo sa Bible sharing: Manager ng Jollibee, patay sa pulis

MANILA, Philippines - Hindi inaasahan ng isang 24-anyos na manager ng isang kilalang food chain na ang pagdalo niya sa isang Bible sharing activity ang magiging mitsa ng kanyang buhay matapos na umano’y mabaril ng isang pulis na nakasagutan nito sa Pasig City kama­kalawa.

Isang tama ng bala ng M-16 armalite sa ulo na tumagos sa panga ang ikinasawi ng biktimang si Irvin Perez, marketing manager ng Jollibee sa Antipolo at naninirahan sa Galaxy St., Cielo Homes, Bgy. San Isidro, Taytay, Rizal.

Kusang-loob namang sumuko sa mga awtoridad ang suspek na nakilalang si PO2 Mark Dorado, 29, nakatalaga sa Rizal Provincial Police, Hilltop, Antipolo City at naninirahan sa Brgy. Manggahan, Pasig City.

Lumilitaw sa imbestigasyon ni SPO1 Randy Aurelia, ng Pasig City Police na dakong ala-1:30 ng madaling-araw nang mangyari ang pamamaril sa tahanan ng pulis, kung saan nagtungo si Perez matapos na imbitahin ng isang Renz Michael Coloma upang dumalo sa isang Bible sharing activity.

Si Coloma ay kasambahay umano ni Dorado dahil pinsan nito ang live-in partner ng pulis.

Nagkaroon naman umano nang hindi pagkakaunawaan sina Perez at Dorado, sa hindi pa matukoy na kadahilanan, na nauwi sa pamamaril.