Binata nagbigti
MANILA, Philippines - Isa na namang panibagong kaso ng pagpapakamatay sa pamamagitan ng pagbigti ang naitala, matapos madiskubreng nakabitin ang isang binata sa lungsod Quezon kamakalawa ng gabi.
Sa ulat ng Quezon City Police District-Criminal Investigation and Detection Unit, nakilala ang nasawi na si Andrew Amayna, 35, ng Jasmin St., Brgy. Amparo Capri, Novaliches, sa lungsod.
Si Amayna ang pangatlo na sa listahan ng mga nagpapakamatay sa pamamagitan ng pagbigti sa sarili, simula noong Linggo.
Ayon kay PO2 Roldan Cornejo, imbestigador sa kaso, ang biktima ay nadiskubre ng kanyang nanay na si Aling Virginia, habang nakabitin sa kisame ng kanilang bahay, ganap na alas-11 ng gabi.
Sa pag-aakalang mabubuhay pa, agad na kinalas ni Aling Virginia sa pagkakabitin ang anak saka isinugod nila ito sa Novaliches District Hospital pero idineklara ring dead-on-arrival.
Sabi ni Cornejo, inaalam pa nila kung ano ang motibo ng biktima para magpatiwakal, gayong ang kanyang mga kaanak ay wala rin alam na problema ito.
Nitong Martes ng umaga isang construction worker ang nagbigti bunga ng selos matapos na maghinala itong ang kanyang live-in partner ay may kinahuhumalingang ibang babae.
Habang Linggo naman ng umaga nang magpakamatay din ang isang registered nurse matapos na hindi matanggap umano ang paghihiwalay nila ng kanyang girlfriend.
Patuloy ang imbestigasyon ng otoridad sa nasabing insidente.
- Latest
