Tsinoy todas sa mag-utol

MANILA, Philippines - Patay ang isang Tsinoy nang saksakin ito ng magkapatid dahil lamang sa matagal na nilang alitan kamakalawa ng gabi sa Pasay City.

Dead-on-arrival sa Ospital ng Maynila ang biktimang si Kristoffer Chan, 36, isang emple­yado, nakatira sa no. 1745 Cuyengkeng St., ng na­turang lungsod, nagtamo ito ng 10 saksak sa iba’t ibang bahagi ng katawan buhat sa isang ice pick.

Nakakulong naman sa Pasay City Police detention cell ang magkapatid na sina Nel at Randy Dela Cruz, naninirahan sa Zone 1, Bgy. 1 ng na­sabing lungsod.

Batay sa isinagawang imbestigasyon nina SPO1 Cris Gabutin at PO3 Giovanni Arcinue, ng Station Investigation and Detection Management Section ng Pasay City Police, naganap ang insidente alas-10:30 ng gabi sa Cuyengkeng St., Zone 1, Bgy. 1 ng naturang siyudad.

Nabatid na may dati ng alitan ang biktima at mga suspek at nang matiyempuhan nila  si Chan habang bumibili ng sigarilyo ay dito na kinompronta ng magkapatid ang una.

Sa kainitan ng pagtatalo, isa sa mga suspek ang bumunot ng ice pick hanggang sa pinagtulungan nilang pagsasaksakin ang biktima  at duguan itong bumagsak.

Matapos ang pananaksak ay tumakas ang magkapatid at sa follow-up operation ng mga pulis­, nadakip din ang mga ito at si Chan naman ay dinala ng ilang residente sa natu­rang ospital subalit namatay din.

Sasampahan ng kasong murder ang magkapatid na Dela Cruz sa Pasay City Prosecutors Office.