Misis tinodas sa burol ni mister

MANILA, Philippines - Isang ginang ang  binaril hanggang sa mapatay ng hindi pa nakikilalang suspek kamakalawa ng gabi sa Tondo, Maynila. Papasok pa lamang umano sa gate ng Building 17 Per­ma­nent Housing, Balut, Tondo ang biktimang si Chona Esplana­, 45, ng 31 Lot 19 Phase IV-A, Brgy. Silangan, San Mateo, Rizal nang barilin  ito ng suspek. Isinugod  ng kanyang kapatid na si Amparo ang biktima sa Tondo Medical Center ngunit binawian din ng buhay. 

Sa imbestigasyon ni SPO1 Richard S. Escarlan ng MPD homicide, alas-9:30 ng gabi nang maganap ang pagbaril sa biktima. Tiniyak umano ng suspek na patay ang biktima bago ito tumakas.  Ayon sa ulat, hiwalay na ng tirahan ang nasawi at mister nito. Dumalaw lang sa burol si Chona bilang respeto sa yumaong asawa. Inaalam pa ng mga awtoridad ang motibo sa pagpaslang sa nasabing ginang.