Karambola sa SLEX: Ex-PBA player, 1 pa patay

MANILA, Philippines - Dalawa katao ang nasawi kabilang ang isang dating player ng Philippine Basketball Association (PBA) at dalawa pa ang sugatan matapos magkarambola ang tatlong sa­sakyan sa South Luzon Expressway (SLEX) sa bahagi ng Muntinlupa City, kamakalawa ng gabi.

Kapwa dead-on-arrival­ sa Parañaque Me­dical Center ang mga biktimang si Bryan Gahol,  at ang kasama nitong babae, na nakilalang si Rosemarie Calara, kapwa residente ng Brgy. Timogan, Los Baños, La­guna at  sakay  sa Nissan Urvan, na may plakang ZFK 893.

Hindi na nagpadala  sa ospital dahil sa minor­ injury lamang  ang tinamo nina Johnny Bansoy at Felix Gonatisie, na sakay naman ng Isuzu  Cargo Jeep na (VRB-364).

Ang kanilang driver na si Alfredo Abe, 42,  at ang driver ng International  Tractor head (UOS-772) na si  Felix Moztaza, 36, ay kapwa nasa custody ng PNP-Highway Patrol Group (HPG) ng Camp Crame.

Sa report  na natanggap ni Senior Ins­pector Juanito Guinid Jr., ng PNP-HPG, na nakabase sa SLEX, naganap ang insidente sa north bound lane ng naturang highway, Brgy. Cupang, Muntinlupa City alas-10:30 ng gabi.

Nabatid na sakay ng Isuzu  Cargo Jeep ang 11 katao kabilang dito ang sugatang sina Bansoy at Gonatisie na minamaneho ni Abe at  habang bi­na­bagtas nila ang center lane ng naturang lugar ay nawalan ng kontrol ang sasakyan  kung kaya’t nabangga nito ang International Tractor Head na minamaneho ni Moztaza na nasa right outer lane naman.

Pagtama sa International Tractor Head ay  kumabig  ang Isuzu Cargo Jeep  sa kaliwa kaya’t tinamaan naman nito  sa left inner lane ang Nissan Urvan na  sakay ang mga nasawing biktima at tatlo pang kasama nito na sina Andro San Pedro; Nixon­ Sumbello at Jesus Apolinario.

Nabatid  na  nawalan ng kontrol ang Nissan Urvan at umikot bago pa ito mabundol ulit ng Isuzu Cargo Jeep  at nadaganan.

Napag-alaman na galing Laguna sina Gaho­l at mga kasama nito  patungo sanang Commonwealth, Quezon City  para dumalo sa isang lamay.

May karga namang mga sibuyas at gulay ang Isuzu Cargo Jeep  na mula San Jose, Occidental Mindoro at may 11 na sakay.

Halos yuping-yupi ang Nissan Urvan na sinasakyan ng mga nasawing biktima.

Si Gahol ay dating PBA player na nasa koponan ng Mobiline, Barako Bull, Petron Blaze at Alaska.