MANILA, Philippines - Timbog ang itinuturong lider ng isang malaking grupo ng carnapping sa isang pagsalakay ng pulisya sa isa sa mga kuta ng sindikato sa isang executive village sa Caloocan City, kamakalawa ng gabi.
Nakilala ang nadakip na si Joem Salvatierra, ng MaÂlolos, Bulacan, itinuturong lider ng ‘Salvatierra carnap gang’ na may operasyon sa buong Metro Manila at mga karatig lalawigan ng Bulacan at Pampanga.
Sa ulat, isang impormasyon ang nakarating sa pulisya sa pagkakakita kay Salvatierra sa bahay ng biyenan nito sa may Wyoming St. sa Vista Verde Executive Subdivision sa Brgy. Llano, ng naturang lungsod.
Armado ng warrant of arrest na inilabas ni Judge Mary Ann Corpus-Manalac ng Malolos, Bulacan Regional Trial Court branch 82, agad na sinalakay ng mga tauhan ng Anti-Carnapping Unit ang naturang lugar na nagresulta sa pagkakadakip kay Salvatierra dakong alas-6 kamakalawa ng gabi.
Narekober ng pulisya sa naturang lugar ang isang hiniÂhinalang carnap na Nissan Frontier (ZTJ-788) pick-up van na pag-aari ng kompanyang Three Step Corporation.
Nabatid na ang grupo rin ni Salvatierra ang nasa likod sa pagtangay sa sasakyan ni Senador Koko Pimentel noong 2012. Ayon pa sa pulisya, sangkot rin ang sindikato sa mga insidente ng pagnanakaw at illegal possession of firearms.