Bagong paglabag ng Nova bus, buking

MANILA, Philippines - Ininspeksiyon at saka binaklas ang plaka ng ilang bus ng Nova Transit ng Land Transportation Franchising Regulatory Board (LTFRB) matapos hindi mag-match ang chassis at plate number ng isa sa bus nito kahapon ng umaga.

Pinangunahan ni Atty.Roberto Cabrera, executive Director ng LTFRB at Land Transportation Office (LTO) ang inspeksyon sa Nova Auto Transport sa garahe nito sa Fairview, Quezon City dakong alas-7:40 ng umaga.

Ayon kay Cabrera, sa isi­nagawang sopresang ins­pection, nadiskubre ng mga ito na isa sa plate number ng Nova bus na TXE-271 ay hindi nagtutugma sa chassis at engine number nito.

Isinagawa ng LTFRB ang inspeksyon matapos ang madugong aksidente na naganap sa GV Florida bus sa Bontoc Mt. Province nitong na­kalipas na Biyernes na iki­nasawi ng 14 na pasahero kabilang ang aktibista at actor­/come­dian na si Tado.

Dahil sa pagkakadis­kubre ng LTFRB sa maling­ plaka, engine at chassis number ng isa sa bus ng Nova, pansamantalang grounded ngayon ang may 66 unit ng bus nito.

Tiniyak din ni Cabrera na bukod sa Nova bus, ilang kompanya pa  ang nakatakda nilang inspeksyunin para na rin sa kaligtasan ng mga pasahero.